क्यासिनोमै बलात्कार

अपराधको अखडा बन्दै गएका काठमाडौंका क्यासिनोलाई प्रहरीले कमाईको माध्यम बनाउदा त्यहाका समस्या झन् जटिल बन्दै गएका छन्। पछिल्लो केही वर्षयता अपराध गरेर कमाएको पैसा क्यासिनोमा गएर सिध्याउने र क्यासिनोमा हारेको पैसा उठाउन अपराधमा लाग्ने प्रवृत्ति मौलाउदै गएको छ। नेपालीका लागि खेल्न प्रतिबन्ध लगाइएका क्यासिनाहरुका व्यवस्थापनले प्रहरीलाई पैसा खुवाएर नेपालीलाई जुवा खेल्न अनुमति दिँदा यस्ता समस्या बढेको मानिन्छ।
डन र अपराधीहरुको अखडा बनेको राजधानीको एउटा क्यासिनोमा अचम्मको बलात्कार भएको छ। बेलायतको ग्रिनगार्ड लिएकी एक नेपाली युवती कमला गुरुङ (नाम परिवर्तन) साग्रिला क्यासिनोमा बलात्कारमा परेकी हुन्। उनीमाथि बलात्कारको अभियोगमा प्रहरीले दुई जनालाई पक्राउ गरी अनुसन्धान गरिरहेको छ।
प्रायःबेलायत नै बस्ने गुरुङ बिन्दास शैलीकी युवती भएको उनका आफन्तहरु बताउछन्। डान्सबार, क्लब र क्यासिनो उनका सोख हुन्। त्यसकारण नेपाल आउदा उनी घरमा रमाउन सकिनन्  र एक विदेशी साथीलाई लिएर सांग्रिला क्यासिनो पुगिन्। क्यासिनोमा जुवा पनि खेलिन्। बेलायती संस्कृतिमा भिजिसकेकाले मदिरा नखाने त कुरै भएन। मदिरा पिउने क्रममा उनले चिनजान कविन शाक्य भने युवासग भयो। पहिला राजधानीमा हप्ता उठाउने शाक्य पछिल्लो समयमा क्यासिनोमा जुवा खेल्नेलाई चर्को ब्याजदरमा पैसा लगानी गर्ने धन्दा चलाउदै आएका छन्। कुनै दिन उनी खुंखार डन चक्रे मिलनका लागि काम गर्थे। तर अहिले उनको अर्का डन दिनेश अधिकारीसग दोस्ती छ।
क्यासिनोमा चिनजान भएपछि निकै समय गुरुङ र शाक्य मदिरा पिउदै  रमाइलो गरे। बिहान दुई बजेपछि घर जाने कुरा भयो। शाक्यले क्यासिनोमा लगानी गरेर गाडी किनिसकेका थिए। त्यसकारण उनले   घरमा ‘ड्रप’ गरिदिने प्रस्ताव युवतीलाई राखे। उनले सहजै स्वीकार गरिन्। ‘त्यसबेलासम्म दुवैजना मदिरामा अर्धबेहोसमा अवस्थामा पुगिसकेका थिए,’ होटलका एक कर्मचारी भन्छन्।
लाजिम्पाटको सांग्रिला क्यासिनोबाट उनीहरु लैनचैरतर्फ आए। साथमा शाक्यका एक सहयोगी पनि थिए। उनीहरु होटलबाट हिंडेको करिब एक घन्टापछि गाडी सांग्रिला होटलमा फर्कियो। युवतीलाई गाडीमा रहेका दुवै युवाले झर्न दबाब दिए, युवती गाडीबाट झर्न मानिन्। शाक्य र उनका साथी दीपक कोदारले उनलाई जबरजस्ती तानेर गाडीबाट झारे। युवतीले होटलमा भएका कर्मचारीहरुसग गुहार मागिन्। आफूलाई शाक्य र उनका साथीले बलात्कार गरे भन्दै। होटलका कर्मचारीले प्रहरीलाई खबर गरे। महानगरीय प्रहरी प्रभाग सोह्रखुट्टेका प्रहरीले भोलिपल्ट शाक्य र कोदारलाई पक्राउ गरी हनुमानढोकामा बुझाए। युवतीले लिखित जाहेरी प्रहरीमा दिइन्। सुरुमा युवतीले बलात्कार बताए पनि पछि भने बलात्कार प्रयास भएको मात्र बताएकी छिन्।
तर पक्राउ परेका शाक्यले भने युवतीले आफूलाई फसाएको दाबी गरेका छन्। लैनचौर आएपछि युवती होटलमै फर्कन चाहेको र आफू फर्केर सांग्रिला पुगेको उनको भनाइ छ। होटलमा पुगेपछि युवती झर्न नमानेपछि आफूले तानेर झारेको उनको बयान छ। प्रहरीले उनीहरुमाथि जबर्जस्ती करणी मुद्दा चलाउने तयारी गरेको छ।–